नेशनल मेडिकल कलेजका चिकित्सकको आन्दोलनप्रति चिकित्सक संघको ध्यानाकर्षण, प्रधानमन्त्रीलाई पत्र

काठमाडौं- नेशनल मेडिकल कलेज शिक्षण अस्पतालमा कार्यरत आवासीय चिकित्सकहरूको आन्दोलन र उनीहरूका माग सम्बोधनका लागि नेपाल चिकित्सक संघले प्रधानमन्त्री एवं चिकित्सा शिक्षा आयोगका अध्यक्षको ध्यानाकर्षण गराएको छ। संघका अध्यक्ष डा. बद्री रिजाल र महासचिव डा. विश्व राज दवाडीद्वारा हस्ताक्षरित ध्यानाकर्षण पत्रमार्फत प्रधानमन्त्रीसमक्ष चिकित्सकहरूका जायज माग अभिलम्ब सम्बोधन गर्न आग्रह गरिएको हो।

संघका अनुसार कलेज प्रशासनले एमडी/एमएस प्रथम वर्षका आवासीय चिकित्सकहरूविरुद्ध अनावश्यक मुद्दा लगाएको, सार्वजनिक बिदाका दिनमा समेत बिदा नदिएको, सरकारी आठौँ तह सरह पाउनुपर्ने निर्वाह भत्ता नदिएको र मानसिक दबाव दिई बिना कारण गयल गरी कारबाही गरेपछि चिकित्सकहरू आन्दोलित भएका हुन्। अहोरात्र सेवामा खटिने चिकित्सकहरूमाथि कलेज प्रशासनबाट भएको यस्तो कार्य प्रचलित कानुन र श्रम ऐनविपरीत हुनुका साथै ठूलो अन्याय भएको संघको ठहर छ।