त्रिशूली बजारमा बाढीले पुरेको घरबाट भेटिएको सुन, चाँदी र नगद घरधनीलाई हस्तान्तरण

नुवाकोट – भदौ १० गते रसुवाको भोटेकोशी नदीमा आएको विनाशकारी बाढीपछि खोज तथा उद्धारमा खटिएको सशस्त्र प्रहरीले नुवाकोटको त्रिशूली बजारमा बाढीले पुरिएको घरबाट सुन, चाँदी र नगद फेला पारी सम्बन्धित घरधनीलाई हस्तान्तरण गरेको छ ।

सशस्त्र प्रहरी बल नेपाल नम्बर १९ गुल्म नुवाकोटबाट खटिएको टोलीले विदुर नगरपालिका–१ स्थित त्रिशूली बजारका स्थानीय अनुज जोशीको बाढीले पुरिएको घरको भग्नावशेषबाट अन्दाजी १५ तोला सुन, ६ तोला चाँदी र नगद ४ लाख रुपैयाँ फेला पारेको हो ।