प्रश्न गरौं, मौन नबसौं

देशमा अहिले चुनावी माहोल बढ्दै गइरहेको छ। यसरी सरर हेर्दा हाँसो पनि उठ्छ, रिससँगै प्रश्न पनि उब्जिन्छन्। देशको नेतृत्व चुन्ने बेला हो यो। तर जति पनि नेतृत्वकर्ता आएका छन्, अजिब–अजिब व्यवहार देखाउँदै छन्। कोही उखु काट्न खेतमा गएका छन्, कोही नाचगान गर्दै छन्, कोही विलासी गाडी चढ्नमा मस्त छन्, कोही स्टन्ट गर्नमै व्यस्त। नेताहरूले किन बिर्से– यो साधारण चुनाव होइन भन्ने यथार्थ?

भदौ २३–२४ को जेनजी आन्दोलनले केही प्रश्न सडकमा उठाएको थियो। त्यो आन्दोलन कुनै दलको थिएन। अन्यायविरुद्ध उब्जेको आवाज थियो। त्यतिबेला युवाहरूले अन्याय, बेथितिविरुद्ध निकालेका आवाज सम्बोधन नगरिँदा, सडकमा निस्केको आवाज नसुनिँदा बल प्रयोग गरी दबाउने प्रयास भयो। लाठी चार्ज, अश्रु ग्यास प्रहार भयो, हजारौं गिरफ्तारीमा परे, कैयौं घाइते भए, धेरैको ज्यान गयो। जसले गर्दा लोकतन्त्रप्रति डर पैदा भयो। यसरी डर, त्रास, अराजकताले नयाँ नेतृत्वको आवश्यकता भएको हो।