सुवास नेम्वाङ, जसले दुई वर्षपछि माधव नेपाललाई एमाले मुख्यालय पुर्याए

नेकपा एमालेको महासचिवका रुपमा झण्डै डेढ दशक बिताएका माधव नेपाल अहिले आफ्नै नेतृत्वमा नेकपा एकीकृत समाजवादी गठन गरेर त्यसको अध्यक्ष छन् । एक वर्षअघि ०७८ भदौ ८ गते निर्वाचन आयोगमा सो पार्टी गठन भएयता नेपालले एमालेको केन्द्रीय कार्यालयमा ‘पाइलो टेकेका’ थिएनन् ।

माधव नेपाल एमालेबाट छुट्टिँदा सो पार्टीको कार्यालय धुम्बाराहीस्थित पासाङल्हामु स्मृति प्रतिष्ठानबाट थापाथलीमा सरेको थियो । थापाथलीमा एक वर्ष बसेर एमालेले ०७९ वैशाख ९ गते केन्द्रीय कार्यालय च्यासलमा सारेको थियो ।