त्रासले एकै मञ्चमा उभिएका ६ भाई माओवादी, ‘अपराधी भन्नेहरु जनयुद्धमा भेटिएका भए सिद्धिने थिए’

काठमाडौं: तत्कालीन नेकपा (माओवादी) विभाजन भएर टुक्राटुक्रा भएको वर्षौँ भइसक्यो। द्वन्द्वका बेलाको माओवादी शीर्ष नेतृत्व एउटै पार्टीमा छैनन्। विभाजित भएका पार्टीमा फेरि फुट र त्यसमा पनि विभाजन भएर एकपछि अर्को पार्टी बनिरहेका छन्। खण्ड-खण्ड भएका माओवादीलाई युद्धकालका घटनाले झस्काइरहेको छ। जसलाई माओवादी नेताले षड्यन्त्र भन्ने गरेका छन् भने पूर्वमाओवादी एकता नहुँदा आफूमाथि प्रहार भएको विश्लेषण उनीहरूको छ।

आइतबार प्रज्ञा प्रतिष्ठानमा आयोजित कार्यक्रममा पनि माओवादीका नेताहरूले अहिले आफूमाथि प्रहार भइरहेको आरोप लगाए। त्यसलाई चिर्न एकता सम्भव नभए मोर्चाबन्दी आवश्यक भएको उनीहरूको भनाइ थियो। माओवादीलाई बिझाएको पछिल्लो घटना हो -प्रधानमन्त्री एवं नेकपा (माओवादी केन्द्र) का अध्यक्ष पुष्पकमल दाहालविरुद्ध रिट दर्ता गर्न सर्वोच्च अदालतले दिएको आदेश।