तल्लो तहमा सर्वदलीय संयन्त्र र बैठक गर्न सर्वदलीय बैठकको निर्देशन

काठमाडौँ । राष्ट्रिय स्वतन्त्र पार्टी (रास्वपा)का सभापति रवि लामिछानेको आह्वानमा बुधबार बसेको सर्वदलीय बैठकले समाजमा शान्ति, सद्भाव र विश्वासको वातावरण कायम गर्न प्रदेश, जिल्ला र स्थानीय तहमा तत्काल सर्वदलीय तथा सर्वपक्षीय संयन्त्र गठन गरी बैठक आयोजना गर्न निर्देशन दिएको छ।

बुधबार जारी सर्वदलीय संयुक्त वक्तव्य तथा अपिलमा केन्द्रको प्रयास मात्र पर्याप्त नहुने उल्लेख गर्दै संवादलाई तल्लो तहसम्म विस्तार गर्न र नागरिकस्तरमा विश्वासको वातावरण निर्माण गर्न सबै राजनीतिक दलका विभिन्न तहका समितिलाई सक्रिय हुन आग्रह गरिएको हो ।