सञ्चारमन्त्री तिमिल्सिनासँग एआईबिडीका सिइओको भेट

सूचना तथा सञ्चारमन्त्री डा विक्रम तिमिल्सिनासँग एसिया–प्यासिफिक इन्स्टिच्युट फर ब्रोडकास्टिङ डेभलपमेन्ट (एआईबिडी) की प्रमुख कार्यकारी अधिकृत (सिइओ) फिलोमेना ज्ञानप्रगासमले बुधबार शिष्टाचार भेटवार्ता गरेकी छन्। भेटमा सञ्चार क्षेत्रको विकास, सामुदायिक रेडियोको भूमिका, सञ्चारसम्बन्धी कानुनी सुधार तथा नेपालमा आयोजना हुने एआईबिडीको २४औँ सम्मेलनको तयारीबारे छलफल भएको मन्त्रालयले जनाएको छ।

मन्त्री तिमिल्सिनाले अन्तर्राष्ट्रिय अनुभव आदानप्रदान र यस्ता सम्मेलनले सञ्चार क्षेत्रको विकासमा सहयोग पुग्ने विश्वास व्यक्त गरे। उनले नेपालमा हुने सम्मेलनले सञ्चार क्षेत्रका समसामयिक चुनौती र अवसरबारे बहस गर्ने अवसर सिर्जना गर्नुका साथै सरकारले अघि बढाएको सञ्चार कानुन सुधार प्रक्रियामा उपयोगी सुझाव प्राप्त हुने बताए।