बैतडीमा सामूहिक जमरा राख्ने प्रचलन

दसैँको पहिलो दिन सोमबार यहाँका शक्तिपीठ तथा मन्दिरमा जमरा राखेर घटस्थापना गरिएको छ । शक्तिपीठ तथा मन्दिरमा सामूहिक जमरा राख्ने प्रचलन रहिआएको संस्कृतिका जानकार आचार्य विष्णुदत्त भट्टले बताउनुभयो । घरघरबाट जौ ल्याएर मन्दिरमा सामूहिक रूपमा जमरा राख्ने चलन रहिआएको उहाँले जानकारी दिनुभयो ।

जिल्लाका सबैजसो मन्दिर तथा शक्तिपीठमा सामूहिक रूपमा जमरा राख्ने चलन रहिआएको छ । जिल्लाका प्रसिद्ध शक्तिपीठमा सोमबार सामूहिक रूपमा जमरा राखिएको निङ्गलाशैनी भगवती मन्दिरका पुजारी लोकराज भट्टले जानकारी दिनुभयो । उहाँका अनुसार गाउँघरका सबै दर्शनार्थीले घरघरबाट जौ र अन्य पूजा सामग्री ल्याएपछि जमरा राखिन्छ ।