नेपालले हिँड्नुपर्ने शैक्षिक बाटो

हरेक केही वर्षमा पिसामा सहभागी देश तथा शिक्षा प्रणालीका सरकार, सरोकारवाला, शिक्षामन्त्री, विद्यालयका शिक्षक, अभिभावक र शिक्षाविद्हरू एउटै प्रश्नको उत्तरका निमित्त प्रतिक्षारत हुन्छन् —बालबालिकाले वास्तवमा कति सिकिरहेका छन्? यो प्रश्नको विश्वव्यापी उत्तर खोज्ने सबैभन्दा चर्चित प्रयासमध्ये एक हो—पिसा अन्तर्राष्ट्रिय परीक्षा। आर्थिक सहयोग तथा विकास संगठन (ओइसीडी) ले सञ्चालन गर्ने पिसा अर्थात् अन्तर्राष्ट्रिय विद्यार्थी मूल्याङ्कन कार्यक्रमले १५ वर्ष उमेरका विद्यार्थीको पढाइ, गणित र विज्ञानसम्बन्धी क्षमतालाई जाँच गर्छ।

यसको उद्देश्य विद्यार्थीले पाठ्यपुस्तकमा सिकेको कुरा कण्ठ पारेको छ कि छैन भन्ने होइन। उसले पढेको कुरा बुझ्न सक्छ कि सक्दैन, गणितीय तर्क गर्न सक्छ कि सक्दैन, प्रमाणका आधारमा सोच्न सक्छ कि सक्दैन र नयाँ परिस्थितिमा आफ्नो ज्ञान प्रयोग गर्न सक्छ कि सक्दैन भन्ने हो।