के कुकुरले पनि मान्छेले बोलेको शब्द पहिचान गर्न सक्छ ?

काठमाडौं । कुकुरले मानिसको निरन्तर बोलीलाई शब्दको लयअनुसार प्रशोधन गर्न सक्ने र त्यस क्रममा व्यञ्जन ध्वनिमा आधारित शब्द संरचनाप्रति विशेष प्रतिक्रिया देखाउने तथ्य एक नयाँ वैज्ञानिक अध्ययनले देखाएको छ ।

अनुसन्धानमा २० जना मानिस र २० वटा पाल्तु कुकुरलाई कुनै स्पष्ट शब्द छुट्याइएको नभएको निरन्तर बोली सुनाएर उनीहरूको मस्तिष्कको गतिविधि तुलना गरिएको थियो । वैज्ञानिकहरूले गैरआक्रामक ईईजी प्रविधिबाट मस्तिष्कले ध्वनिको लयसँग कसरी तालमेल मिलाउँछ भन्ने अध्ययन गरेका थिए । अध्ययनका प्रमुख अनुसन्धानकर्ता तथा संज्ञानात्मक स्नायुविज्ञानी अटिला एन्डिक्सका अनुसार स्वरभन्दा व्यञ्जन ध्वनि नै शब्दको आधारभूत संरचना बन्ने भएकाले कुकुरको मस्तिष्कले पनि त्यही संरचनाप्रति बढी प्रतिक्रिया दिएको हो ।