संयुक्त राष्ट्रसंघको ८१ औं महासभा :नेपालको सशक्त प्रस्तुति, सार्थकता गृहकार्यमा निर्भर

प्रधानमन्त्री बालेन्द्र शाहले गत शुक्रबार अमेरिकाको न्युयोर्कमा संयुक्त राष्ट्रसंघको ८१ औं महासभालाई गर्नुभएको सम्बोधनले यतिखेर विश्व समुदायको ध्यानाकर्षण गराएको छ । शाहको सशक्त प्रस्तुति यसकारण पनि चर्चित बनेको छ कि जलवायु परिवर्तनका कारण उत्पन्न संकटले विश्वका सम्पूर्ण मानवजातिका लागि चेतावनी दिएको छ यसले ।

अघिल्लो महिना नेपालले भोग्नुपरेको विनाशकारी भोटेकोशी–रसुवा बाढीको कहरलाई बुँदागत रुपमा प्रस्तुत गरेर कार्बन उत्सर्जनका कारण उत्पन्न हुने जलवायु परिवर्तनबाट उत्पन्न संकटको सिकार यतिखेर नेपाल बने पनि प्रत्यक्ष वा परोक्ष रुपमा सारा विश्व नै मानवीय संकटबाट मुक्त नभएकोले सबै सचेत हुनुपर्ने सन्देश प्रवाह भएको छ । त्यसो त यसपटक राष्ट्रसंघ महासभामा नेपालका अतिरिक्त अन्य तीन दर्जनभन्दा बढी देशका प्रतिनिधिहरुले पनि जलवायु परिवर्तनको रुप बाढी, पहिरो, सुख्खा खडेरी, हावाहुरी, आगलागी, सुनामीलगायतका विभिन्न खाले संकट उत्पन्न हुने भएकाले मानवजातिकै अस्तित्व संकटमा पर्दै गएको चिन्ता प्रकट गरेका छन् ।