आठ महिनापछि सक्रिय हुँदै संसदीय समिति

काठमाडौं । सरकारका निर्देशक समितिका रूपमा रहेका संसदीय समितिहरू आठ महिनापछि सक्रिय बन्न लागेका छन् । निर्वाचन पछि शुरू भएको नयाँ प्रतिनिधिसभाको संसदीय समितिहरूको सभापति पदका लागि आइतबार विभिन्न दलका सांसदहरूले उम्मेदवारी दर्ता गरेसँगै संसदीय समितिहरू सक्रिय बन्न लागेका हुन् ।

सत्तारुढ गठबन्धन र प्रमुख प्रतिपक्षी दल नेपाल कम्युनिस्ट पार्टी (एमाले) बीच संसदीय समितिको सभापतिमा भएको भागबण्डाको सहमतिअनुसार सांसदहरूले उम्मेदवारी दर्ता गरेका हुन् । दलहरूले प्रतिनिधिसभाका १० र संघीय संसद्को संयुक्त दुई गरी १२ वटा समितिको नेतृत्वमा भागबण्डा गरेका थिए । जसमा संसद्को ठूलो दल नेपाली कांग्रेसले ४ वटा समितिको नेतृत्व पाउने भएको छ भने एमालेले एउटा संयुक्त समिति र सार्वजनिक लेखा समितिसमेत गरी ३ वटाको नेतृत्व पाउने भएको छ । लेखा समिति सभापतिमा नेकपा एमालेका ऋषिकेश पोखरेलले उम्मेदवारी दर्ता गराउनुभएको छ भने किरण साहले महिला बालबालिका तथा सामाजिक समितिको सभापतिमा उम्मेदवारी दर्ता गर्नुभएको छ ।