‘आ बाट आमा–२’ को नयाँ गीतमा पल र मलिका रमाउँदा आकाशको कर्के नजरमा दर्शकको कौतुहलता

काठमाडौं– असोज ३० गतेदेखि प्रदर्शनमा आउने तयारीमा रहेको फिल्म ‘आ बाट आमा २’ को नयाँ गीत ‘अचेल किन कान्छी’ मंगलवार दिउँसो सार्वजनिक भएलगत्तै दर्शक तथा स्रोताको रोजाइमा परिसकेको छ । विवाहको मण्डपमा तयार पारिएको यो गीतको भिडियोमा फिल्मका प्रमुख कलाकार पल शाह र मलिका महतको जोडीलाई रोमान्टिक तथा रमाइलो भावमा प्रस्तुत गरिएको छ ।

रवि ओड तथा गंगा सोनमको स्वरमा तयार भएको यो गीतमा पल र मलिकासँगै अभिनेता आकाश श्रेष्ठ पनि देखिएका छन् । तर, पल र मलिका नाच्दै रमाइरहँदा आकाश भने उनीहरूलाई कर्के नजरले हेरिरहेको दृश्यले भने गीतलाई थप रोचक बनाएको छ । ‘अचेल किन कान्छी’ लाई बाबुल गिरीले संगीतबद्ध गरेका हुन् । गीतको कोरियोग्राफी गम्भीर विष्टले गरेका हुन् ।