बिस्का जात्रा सुरुः जसले पृथक् अस्तित्व बोकेको छ

काठमाडौं । आठ रात नौ दिनसम्म मनाइने ऐतिहासिक विस्का जात्रा भक्तपुरमा मंगलबारबाट सुरु भएको छ । भक्तपुरको टौमढीस्थित पाँचतले मन्दिर अघिबाट भैरवनाथको रथ प्रतिस्पर्धात्मक रूपमा तानातान गर्दै जात्रा सुरु भएको हो ।

प्यागोडा शैलीको तीनतले मन्दिर स्वरूपको भैरवनाथको रथलाई टौमढीभन्दा माथिल्लो टोलले तानेर लग्नसके दतात्रयसम्म र टौमढीभन्दा तल्ले टोलका बासिन्दाले तानेर लानसके वंशगोपालसम्म रथ लाने परम्परा रहेको छ । भक्तपुरको माथिल्लोपट्टि र तल्लोपट्टिका युवाहरूले साँझ ५ बजेदेखि रथ तानातान प्रतिस्पर्धा सुरु गरे पनि साँझ साढे ७ बजेसम्म सो प्रतिस्पर्धा चलेको थियो । साँझ ७ बजेपछि मात्र माथिल्लो टोलका स्थानीयले रथ आफ्नो टोलमा लान सफल भएका थिए ।