अवरुद्ध टेलिकम सेवा छिटो सञ्चालन गर्न मन्त्री तिमिल्सिनाको निर्देशन

काठमाडौं। सूचना तथा सञ्चारमन्त्री डा. विक्रम तिमिल्सिनाले बाढीपहिरोबाट अवरुद्ध नेपाल टेलिकमको सेवा शीघ्र पुनःसञ्चालन गर्न निर्देशन दिएका छन्। असोज ८ देखि ११ गतेसम्मको विपद्ले प्रभावित १ हजार १३२ टावरमध्ये १ हजार २ वटा सञ्चालनमा आएका छन् भने १३० वटा अझै बन्द छन्।

मन्त्रालयमा टेलिकमको उच्च व्यवस्थापनसँग भएको छलफलमा मन्त्री तिमिल्सिनाले सेवा अवरुद्ध हुँदा स्थानीय बासिन्दा, उद्धारकर्मी र सरकारी निकायलाई कठिनाइ हुने भएकाले पुनःस्थापनालाई प्राथमिकता दिन आग्रह गरे। विद्युत् आपूर्ति तत्काल सम्भव नभएका स्थानमा वैकल्पिक उपाय अपनाएर सेवा चलाउन उनले निर्देशन दिए।