‘बालेन सरकार विधिको शासन र कानुन कार्यान्वयनमा चुक्यो’ : देवेन्द्र पौडेल

काठमाडौँ । नेकपाका नेता देवेन्द्र पौडेलले वर्तमान रास्वपा सरकार विधिको शासन र कानुन कार्यान्वयनको सवालमा पूर्ण रूपमा चुकेको आरोप लगाएका छन्। रिपोर्टर्स क्लब नेपालद्वारा आयोजित साक्षात्कार कार्यक्रममा बोल्दै नेता पौडेलले मुलुकको स्थायित्वका लागि पाँच वर्ष नै सरकार चलाएर समृद्धिको दिशामा लाग्नुपर्नेमा जोड दिए पनि सरकार सही बाटोमा नहिँडेको दाबी गरे ।

पूर्ववर्ती सरकार र राजनीतिक दलहरूका कमजोरीका कारण राष्ट्रिय स्वतन्त्र पार्टी (रास्वपा) को उदय भएको उल्लेख गर्दै पौडेलले तर बालेन सरकारको बजेट तथा नीति र कार्यक्रममा कुनै नयाँ कुरा आउन नसकेको टिप्पणी गरे। “सरकारले प्रस्तुत गरेको नीति तथा कार्यक्रममा डिजिटल भुक्तानीको प्रसङ्गबाहेक अरू कुनै नयाँ सोच वा दृष्टिकोण छैन,” उनले भने।