अतिक्रमित वन खाली गराई विस्तार र संरक्षण गर्दै वन कार्यालय

राजविराज । डिभिजन वन कार्यालय सप्तरीले वन व्यवस्थापन, संरक्षण र आर्थिक उपार्जनका विभिन्न गतिविधिमा जोड दिएको छ । विभिन्न प्रजातिका बोटबिरुवा र जडीबुटी उत्पादनदेखि उद्यमशील विकासमा समेत वन कार्यालय सक्रिय देखिएको छ ।

जिल्लाको सबडिभिजन वन कार्यालय कञ्चनपुरमा वन नर्सरी स्थापना गरी विविध जातजातिका बिरुवा उपलब्ध गराइरहेको वन कार्यालयले चुरेफेदीमा रहेको सुरुंगा नगरपालिका–६ स्थित सेतीदेवी सामुदायिक वनका साथै रुपनी गाउँपालिका–६ तेरहौतामा खाँडो खोला नदी उकास जग्गा र कञ्चनरूप नगरपालिका–४ पौडा खोला वन क्षेत्रमा वृक्षरोपण, अतिक्रमित वन क्षेत्र खाली र तारले घेरबारलगायतका काम गरी वन क्षेत्रको विकास र संरक्षण कार्यलाई तीव्र बनाएको हो ।