विद्यालय छ, शिक्षक छन्, तर छैनन् विद्यार्थी

सुर्खेत। दैलेखको नौमुले गाउँपालिका-६ तल्लो नाउलेमा रहेको भैरव प्राथमिक विद्यालयको सेवा क्षेत्रमा ४२ घरधुरी छन्। प्रारम्भिक बालविकास (ईसीडी)देखि कक्षा ५ सम्म पढाइ हुने यस विद्यालयमा विद्यार्थी भने जम्मा २६ जना छन्। तीमध्ये १० जना प्रारम्भिक बालविकास केन्द्रमा छन्। कक्षा १ देखि ५ सम्म १६ जना मात्र विद्यार्थी छन्।

विद्यालयमा शिक्षक दरबन्दी दुई जनाको छ। पहाडी जिल्लाका लागि कायम गरिएको विद्यार्थी-शिक्षक अनुपातअनुसार एक शिक्षक बराबर ३५ विद्यार्थी हुनुपर्छ। तर, भैरव प्राथमिक विद्यालयमा कुल विद्यार्थी संख्या एक शिक्षक बराबर पनि पुग्दैन।