विकास निर्माण र जनजीविकाका सवालमा बेवास्ता

वर्तमान गठबन्धन सरकारले आर्थिक समृद्धि र सुशासनलाई ध्यान दिन नसक्दा विकास निर्माण र जनजीविकाका सवालहरु पूर्णरुपमा ओझेलमा परेका छन् । पुष्पकमल दाहाल प्रचण्ड नेतृत्वको सरकार सानातिना विषयमा अल्झिँदा विकास निर्माणका योजनाहरुसमेत अवरुद्ध हुने अवस्था आएको छ । प्रधानमन्त्री नवीन खालका योजना बनाउन र त्यसलाई कार्यान्वयन गर्नभन्दा पनि विभिन्न खाले उद्घाटन, शिलान्यासजस्ता कार्यक्रममा बढी अड्किरहनुभएको छ । यसले गर्दा आम जनतालाई निराश बनाउने काम भइरहेको छ । अहिले मुलुकका विभिन्न स्थानमा विकास निर्माणका कार्यहरु अवरुद्धजस्तै छन् । सरकारी संयन्त्रहरुले प्रभावकारीरुपमा काम गरिरहेका छैनन् । प्रशासनिक संयन्त्र अत्यन्तै सुस्त छ । जनताका जनजीविकाका सवालहरु ओझेल परिरहेका छन् । जब आम जनताका जनजीविकाका सवालहरु ओझेलमा पर्छन् तब जनताले सरकारप्रति अपनत्व ग्रहण गर्न सक्दैनन् । जनताले अपनत्व ग्रहण गर्न नसक्ने सरकार कमजोर वन्छ ।

मानिसका आधारभूत आवश्यकतामा गाँस, बास, कपास मात्रै होइन अब त्यससँगै स्वास्थ्य, शिक्षा, सुरक्षा, प्रविधि र रोजगारीसमेत जोडिएर आउन थालेका छन् । आफ्ना जनताले यी आधारभूत आवश्यकताको सहज प्रयोग गर्न पाएका छन कि छैनन् भन्ने विषयमा सरकारी संयन्त्रले गम्भीरतापूर्वक मनन गर्न सकेको देखिँदैन, जसका कारण जनता आहत छन् । नागरिकहरु अहिले सबैभन्दा बढी प्रताडित र पीडित हुनु परेकै महँगो शिक्षा र स्वास्थ्यका कारण हो । स्वास्थ्य र शिक्षामा व्याप्त बेथिति र विसंगतिका कारण आम जनतामा नैराश्यता बढ्दो छ । यदि सरकारले स्वास्थ्य र शिक्षालाई मात्रै सुलभ गराउन सक्ने हो भने त्यो सरकारका लागि ठूलो सफलताको विषय हुनेछ । तर त्यसतर्फ शासकहरुले कहिल्यै पनि गम्भीर भएर सोच्ने गरेका देखिँदैनन् । उनीहरु प्रायः आफ्नै स्वार्थमा व्यस्त हुने गरेका छन् । आफ्नै स्वार्थमा व्यस्त हुँदा जनताका समस्यामा सोच्ने फुर्सद नपाउने नेता तथा शासकहरुको हातमा सत्ताको बागडोर जाने परिस्थिति सिर्जना हुनु पनि दुर्भाग्यपूर्ण छ । यसै गरी दैनिक उपभोग्य वस्तुमा भएको अस्वाभाविक मूल्यवृद्धिले पनि जनता अत्यधिक मर्कामा परिरहेका छन् ।