दशैँअघि नै सीमा नाका खुलाऊ

मित्र राष्ट्र चीनसँग सीमा जोडिएका प्रायः सबै नाका अवरुद्ध भएपछि नेपालीको सबैभन्दा ठूलो चाड दशैँ महँगो हुने भएको छ । सञ्चालन भइरहेको बाँकी एकमात्र कोरला नाका पनि बन्द भएपछि आयात ठप्प भएको छ । दशैँको सामग्री बोकेका कन्टेनर कोरला नाकामा फसेका छन् । सयौंको संख्यामा इलेक्ट्रिक सवारीसाधन भन्सारमा अलपत्र परेका छन् । नेपालको लागि चाडबाड लक्षित सामग्री बोकेका मालवाहक कन्टेनरहरू पनि नाकामा अलपत्र छन् ।

नेपालसँग चीनको सिमाना जोडिएका कोरला, केरुङ र तातोपानी नाका प्रमुख हुन् । एक महिनाको बीचमा चीनसँगका प्रमुख व्यापारिक नाका केरुङ र कोरलासम्मको पहुँचमार्ग बाढीपहिरोका कारण अवरुद्ध भएको छ । तातोपानी नाका पनि सञ्चालनमा आउन सकेको छैन । असोज १० गते आएको भोटेकोशी बाढीले टिमुरे भन्सार ध्वस्त बनाएपछि व्यापारिक सिमाना बन्द छ । यस नाकासँगको कनेक्सन तत्काल जोडिने सम्भावना छैन । चीन सरकारले आफूतर्फको सडक तयार गरे पनि नेपालतर्फको कहिले बन्छ ? अनिश्चित छ ।