'डिप्रेसन भयो भन्दैमा लज्जित नहोऔं, सकारात्मक कुरामा ध्यान दिऔँ'

राष्ट्रिय मानवअधिकार आयोगका सदस्य प्राडा. सूर्यप्रसाद ढुङ्गेलले निराश (डिप्रेसन) भयो भनेर लज्जित नहुन आग्रह गरेका छन् । सडक आश्रित मानवमुक्त अभियान नेपालद्वारा सोमबार ललितपुरमा आयोजित आत्महत्या रोकथामसम्बन्धी सहयोगी पुस्तक विमोचन कार्यक्रमलाई सम्बोधन गर्दै उनले निराश पनि एक प्रकारको रोग भएकाले बेलैमा सचेत भई उपचार गर्नुपर्छ सुझाव दिए ।

“डिप्रेसन भयो भनेर लज्जित हुनुपर्ने कुनै कारण छैन । हरेक मान्छेमा डिप्रेसन हुन्छ । कति प्रतिशत भन्ने मात्रै हो । पाँचा–सात प्रतिशत हुँदा हामीलाई याद नभएको हुन सक्छ । धेरै प्रतिशत हुँदा समस्या हुने हो”, उनले भने, “आफ्नो ज्यान आफैँले समाप्त गर्नु भनेको मानवअधिकार हनन् पनि हो । बाँच्न पाउने अधिकारबाट आफैँले आफैँलाई समाप्त पार्नु पनि पाप हो । तसर्थ आत्महत्या गरेर आफ्ना परिवारजन, आफन्तमाथि पनि अन्याय गर्नुहुँदैन । एउटा मानिससँग धेरै मान्छेको साथ र अपेक्षा जोडिएको हुन्छ ।”