जमिन चिरा पर्न थालेपछि पाल्पाको देवगीर बजार पहिरोको उच्च जोखिममा

तानसेन : लगातार चार दिनको अविरल वर्षाका कारण जमिन चिरा परेपछि पाल्पाको माथागढी गाउँपालिका–४ स्थित देवगीर (खलिपोखरा) बजार पहिरोको उच्च जोखिममा परेको छ।

बासटारी–झडेवा–दुम्कीबास बहुप्रादेशिक सडकअन्तर्गत देवगीर बजारको बीच भागबाटै करिब २०० मिटर लामो धाँजा फाटेपछि सिंगो देवगीर बजार पहिरोको उच्च जोखिममा परेको हो। देवगीर बजारको बीच सडकमा फाटेको धाँजा १ इन्च फराकिलो र ५ फिटसम्म गहिरो रहेको स्थलगत अनुगमनमा खटिएका लुम्बिनी प्रदेश सांसद खेमबहादुर सारुले बताए।