बर्दिबासमा सौर्य ऊर्जा आयोजना सुरु

महोत्तरी । बर्दिबास–६ चौलिखामा २० मेगावाट विद्युत् उत्पादन हुने सौर्य ऊर्जा आयोजना सुरु भएको छ । टेरा सोल इनर्जीले रु एक अर्ब २० करोडको लागतमा आयोजनाको काम बिहीबार सुरु गरेको हो । छ महिनाभित्र विद्युत् उत्पादन गर्ने आयोजनाको लक्ष्य छ ।

बर्दिबास–६ र ७ का ८० भन्दा बढी किसानको ४० बिघा जग्गा ३० वर्षको भोगाधिकारसहितको भाडामा लिएर निर्माण कम्पनीले काम थालेको छ । छ महिनाभित्र २० मेगावाट विद्युत् उत्पादन गरी नेपाल विद्युत् प्राधिकरण ढल्केबर ग्रिड महाशाखालाई हस्तान्तरण गरिने लक्षसाथ काम थालिएको निर्माण कम्पनीका कार्यकारी निर्देशक पूजा चन्दले बताइन् । आयोजनाको निर्माणकार्यको शुभारम्भ मधेसका मुख्यमन्त्री कृष्णप्रसाद यादवले एक समारोहबिच गरेका हुन् ।