जुम्लाका स्याउसँगै फल्दै छ कर्णालीको भविष्य

जुम्ला । वारिपारिका ज्युलोमा मार्सीको बयली । बीचमा तिला नदीको उर्लंदो भेल । अनि डाँडापाखामा लोभलाग्दो गरी फलेका स्याउ बगैंचा । तिला नदीको सुसेलीसँगै खेतमा मार्सी धान हुर्किंदै छ । पाखाका स्याउ बगैंचामा भने किसानको हलचल बढिरहेको छ । यो जुम्लाको वर्तमान हो ।

जब मध्य वर्षायाम आउँछ, तब यसले चुपचाप किसानहरूमा एकाएक हलचल ल्याइदिन्छ । साउन महिनामा फुर्सदिला बनेका जुम्ली किसानलाई भदौ पहिलो साताबाट स्याउ टिप्ने चटारो हुन्छ । जुम्लामा स्याउ टिप्न सुरु भइसकेको छ । वर्षभरिको मिहिनेतबाट आम्दानीको जोडघटाउमा किसान जुटिसकेका छन् । स्याउ परिपक्व भइसकेकाले बेच्न सुरु गरिएको तातोपानी–७ सर्मीका मुनबहादुर कुँवरले बताए ।