श्रेष्ठलाई मरणोपरान्त नागरिक सम्मान

काठमाडौँ महानगरपालिकाकी कार्यवाहक प्रमुख सुनिता डङ्गोलले जनकवि दुर्गालाल श्रेष्ठलाई मरणोपरान्त ‘जनकवि अक्षरमहर्षि दुर्गालाल श्रेष्ठ’ उपाधि तथा नागरिक सम्मान प्रदान गरिएको घोषणा गर्नुभएको छ । श्रेष्ठको ४५ औँ पुण्यतिथिका अवसरमा दुर्गालाल साहित्य प्रतिष्ठान र वसन्त चौधरी फाउन्डेसनको संयुक्त आयोजनामा ‘अक्षरयात्रा दशक आठ’ कार्यक्रममा कार्यवाहक प्रमुख डङ्गोलले जीवितै छँदा गत भदौ महिनामा नागरिक अभिनन्दनमार्फत यो सम्मान दिने तयारी भइरहेको जानकारी दिनुभयो । उहाँले भन्नुभयो, “नागरिक सम्मानको तयारी भएका बेला भदौ १ गते उहाँको निधन भएको थियो । त्यसैले मरणोपरान्त नागरिक अभिनन्दन गर्ने निर्णय गरिएको हो ।” श्रेष्ठको भाषा र साहित्यप्रतिको समर्पण भावी पुस्ताका लागि अनुकरणीय रहेको पनि डङ्गोलले बताउनुभयो ।

कार्यक्रममा डा. अभि सुवेदी र ज्योति तुलाधरले श्रेष्ठका कविताबारे समीक्षा गर्नुभएको थियो । श्रेष्ठका शब्द सरल र सहज भएकाले रचनामार्फत सदैव जीवित रहने डा. सुवेदीले बताउनुभयो । फाउन्डेसनका संरक्षक वसन्त चौधरीले श्रेष्ठलाई आफ्ना गुरुका रूपमा स्मरण गर्नुभयो । श्रेष्ठले छोडेर जानुभएको शब्दको विरासतलाई नयाँ पुस्तासम्म पुर्‍याउने प्रतिबद्धता उहाँले व्यक्त गर्नुभयो । कार्यक्रममा चौधरीले ‘फिँज’ सङ्ग्रहबाट कविता वाचन गर्नुभएको थियो । त्यस्तै सहभागीले श्रेष्ठप्रति लेखिएका स्मरणका शब्दहरू एकसाथ प्रदर्शन गर्दै उहाँप्रति सम्मान र अक्षराञ्जली अर्पण गरेका थिए ।