अभिभावकमा हुनुपर्ने शिष्टता

अभिभावकले आफूभन्दा सानाबाट शिष्टताको अपेक्षा गर्छन् । यसका लागि साना नानीलाई दुःख पनि दिन्छन् । अनावश्यक डाँट्ने, पिट्ने र हप्काउने गर्छन् । तर, आफू भने छाडा बोल्ने, मदिरा सेवन गर्ने र जथाभावी व्यवहार गर्न हिच्किचाउँदैनन् । हुन त आफ्ना सन्तानले कहिल्यै पनि दुःख नपाऊन्, सधैं खुसी रहून् भन्ने उनीहरूको चाहना हुन्छ पनि । यस्तो चाहना अन्यथा पनि होइन । स्वाभाविक हो । आफ्ना सन्तानले दुःख पाएको, देख्दा जोकसैको पनि मन रुन्छ । मन शान्ति पनि हुँदैन ।

तर, आचारविचारका कुरा सबैमा समान रूपमा लागू हुन्छन् । केटाकेटीमा लागू हुने तर आफू भने पानीमाथिको ओभानो रहने हुँदैन । यसो भयो र अभिभावक आफैं नकारात्मक बानी र लतको सिकार छन् भने आफ्ना सन्ततिलाई राम्रो बनाउँछुभन्दा झनै नराम्रो असर पर्न जान्छ । कतिपय अवस्थामा राम्रै गर्छुभन्दा पनि नराम्रो अवस्था सिर्जना हुन पुग्छ ।