संवैधानिक प्रावधानलाई एमालेले मजाक बनाएको प्रभु साहको आरोप

काठमाडौं । आम जनता पार्टी (आजपा) का अध्यक्ष तथा पूर्वमन्त्री प्रभु साहले नेकपा (एमाले) ले संवैधानिक प्रावधानलाई मजाक बनाएको आरोप लगाएका छन्। देवाही–गोनाही नगरपालिकाका मेयर प्रेमलाल साह कानूलाई पदमुक्त गराइएको विषयलाई लिएर उनले एमालेले लोकतान्त्रिक मूल्य, मान्यता र संविधानको मर्मविपरीत काम गरेको दाबी गरेका हुन्।

साहले स्थानीय तहका पदाधिकारीको पद रिक्त हुने अवस्था संविधानमा स्पष्ट रूपमा राजीनामा, मृत्यु वा पदावधि समाप्त भएको अवस्थामा मात्र उल्लेख गरिएको भन्दै मेयर कानूलाई पदमुक्त गर्नु असंवैधानिक भएको बताए। उनका अनुसार संविधानको धारा २१६ को उपधारा (८) ले स्थानीय तहका प्रमुख, उपप्रमुख, वडाध्यक्ष र सदस्यको पद रिक्त हुने अवस्था स्पष्ट रूपमा व्यवस्था गरेको छ।