सन् २०२८ अघि चीनले ताइवानमाथि आक्रमण गर्ने सम्भावना न्यून रहेको अमेरिकी अधिकारीहरूको ठहर

एजेन्सी । चीनका राष्ट्रपति सी चिनपिङले आवश्यक परेको खण्डमा लोकतान्त्रिक रूपमा शासित टापु (ताइवान) लाई सैन्य बलद्वारा नियन्त्रणमा लिन सन् २०२७ सम्ममा आफ्नो सेना तयार रहन निर्देशन दिएको भए तापनि सन् २०२८ अघि चीनले ताइवानमाथि आक्रमण गर्ने सम्भावना झन्झन् न्यून बन्दै गएको अमेरिकी अधिकारीहरूले विश्वास गरेको अमेरिकी सोचसँग परिचित व्यक्तिहरूले रोयटर्सलाई बताएका छन् ।

दुई वर्तमान अमेरिकी अधिकारी, एक पूर्व अमेरिकी अधिकारी र यस मामिलासँग परिचित एक व्यक्तिका अनुसार, यसका मुख्य कारणहरूमा चिनियाँ कम्युनिस्ट पार्टीको भ्रष्टाचार विरोधी अभियानका बीच सैन्य तत्परतामा भएको ढिलाइ र ताइवानको सन् २०२८ को चुनावको नतिजा हेर्ने बेइजिङको उत्सुकता समावेश छन् । त्यसबाट उक्त टापुलाई चिनियाँ नियन्त्रणमा ल्याउन थप लचिलो सरकार आउन सक्ने केही चिनियाँ अधिकारीहरूको आशा छ ।