काठमाडौँमा शिक्षकको आन्दोलन, गोरखाका जनप्रतिनिधि सङ्घ सरकारसँग रिसाए

पोखरा । काठमाडौँमा भएको शिक्षकहरूको आन्दोलनमा गोरखाका जनप्रतिनिधिले ऐक्यबद्धता जनाएका छन् । सोमबार विज्ञप्ति निकालेर उनीहरूले संविधान जारी भएको १ दशक बित्दा समेत विद्यालय शिक्षा ऐन जारी नहुनु दुःखद भएको जनाएका छन् । जिल्लामा रहेका ११ वटै पालिकाका प्रमुखहरूले हस्ताक्षर गरेर तुरुन्त विद्यालय शिक्षा ऐन जारी गर्न माग गरेका हुन् ।

‘विद्यालयको कक्षाकोठामा बालबालिकाहरूलाई ज्ञान र सिप प्रदान गरी कर्मठ र दक्ष नागरिक उत्पादन गर्ने शिक्षकहरू यति बेला शिक्षा क्षेत्रको दर्जनौँ मुद्दाको भारी बोकेर देशभरबाट राजधानी केन्द्रित आन्दोलनमा एकाकार भएका छन्,’ उनीहरूले भने, ‘लामो समयदेखि सङ्घीय संसद्, प्रतिनिधिसभामा प्रक्रियामा रहेर जारी गर्नका लागि विलम्ब भइरहेको शिक्षा विधेयक तत्काल जारी गर्नुपर्ने माग राख्दै आन्दोलनप्रति हामी ऐक्यबद्धता जाहेर गर्दछौँ ।’