श्रमिकको सुरक्षा गर्न इजरायल र ओमानसँग सम्झौता

नेपाल सरकारले वैदेशिक रोजगारीमा रहेका हजारौँ नेपाली श्रमिकको सुरक्षालाई संस्थागत गर्न इजरायल र ओमानसँग श्रम सम्झौताको प्रक्रिया अगाडि बढाएको छ । श्रम, रोजगार तथा सामाजिक सुरक्षा मन्त्रालयले इजरायल र ओमानसँग श्रम सम्झौता अघि बढाउने औपचारिक प्रक्रिया थालेको हो ।

परराष्ट्र मन्त्रालयमार्फत दुवै देशलाई श्रम सम्झौतासम्बन्धी पत्राचार गरेको श्रम मन्त्रालयले जनाएको छ । गत २१ पुसमा बसेको मन्त्रिपरिषद् बैठकले ओमानसँग श्रम समझदारी पत्र र इजरायलसँग श्रम सम्झौता नवीकरण गर्ने निर्णय गरेको थियो । सोही निर्णय कार्यान्वयनका लागि श्रम मन्त्रालयले परराष्ट्र मन्त्रालयलाई पत्र लेख्दै सम्बन्धित देशसँग आवश्यक कूटनीतिक प्रक्रिया अघि बढाउन आग्रह गरेको जनाएको छ ।