सत्ता समीकरण बदलिएपछि अर्थमन्त्री पुनको प्रतिक्रिया : बेचन पक्राउ परेपछि कांग्रेस ‘बेचैन’ भयो

काठमाडौँ । नेपाली कांग्रेस र नेकपा एमालेसहितको सत्ता समीकरण फेरबदल गर्ने सहमति भएसँगै माओवादी केन्द्रका उपमहासचिव एवं अर्थमन्त्री वर्षमान पुनले आफू प्रतिपक्षमा बस्ने बताएका छन् । साथै उनले एमालेका अध्यक्ष केपी शर्मा ओलीले दोहोरो भूमिका खेलेकोमा आश्चर्य व्यक्त गरेका छन् ।

सोमबार साँझ कांग्रेसका सभापति शेरबहादुर देउवा र एमालेका अध्यक्ष ओलीबिच सत्ता सहकार्य गर्ने सहमति गरेर मध्यरातमा राष्ट्रपति भेट्न शीतल निवास पुगेपछि मन्त्री पुनले आश्चर्य व्यक्त गरेका हुन् । ‘प्रधानमन्त्री निवास बालुवाटारमा ओलीले बाहिर आएका विषय सबै भ्रम हुन्, यही गठबन्धनलाई अझ बलियो बनाएर ०८४ को चुनावसम्म लैजाने र चुनावपछि पार्टी एकता गर्ने प्रधानमन्त्री प्रचण्डलाई भन्दै ओलीले ढुक्क हुन भन्नुभएको थियो,’ पुनले भने ।