सुन्दरता र अदृश्य त्रासदीको दोसाँधमा कर्णालीको रारा

मुगु । कर्णाली प्रदेशको प्राकृतिक गहना र नेपालको सबैभन्दा ठूलो तालका रूपमा परिचित रारा ताल यति बेला सुन्दरतासँगै एउटा अदृश्य त्रासदी र भयको केन्द्र बनेको छ । लगातारको अविरल वर्षा, जलाधार क्षेत्रमा आएको परिवर्तन र जलवायु परिवर्तनका विश्वव्यापी प्रभावका कारण रारा तालमा पानीको सतह अस्वाभाविक रूपमा वृद्धि भइरहेको छ । यसले ताल फुट्न सक्ने वा यसको प्राकृतिक निकास (खत्याड खोला) ले ठूलो रूप लिई तटीय क्षेत्रलाई कटान गर्न सक्ने त्रास मुगुका स्थानीय बासिन्दाहरूमा छाएको छ ।

खास गरी सदरमुकाम गमगढीसहित झ्यारी, टोप्ला, खत्याड र सोरु गाउँपालिकाका तटीय एवं आसपासका बस्तीहरूका सर्वसाधारण यति बेला सम्भावित प्राकृतिक विपत्तिका कारण रातभर निदाउन छाडेका छन् । एकातिर प्राकृतिक सम्पदाको संरक्षण र पर्यटनको प्रवद्र्धनको कुरा भइरहँदा अर्कातिर यहाँका हजारौँ नागरिकको जनजीवन भने प्राकृतिक जोखिमको दोसाँधमा उभिएको छ ।