हरिवंशको ५५ हजार किलोमिटर बीवाईडी यात्रा : ‘अरू गाडी साह्रो लाग्न थाल्यो’

१६ असोज, काठमाडौं । थापाथली नजिकै एउटा कार्यालयमा चर्चित हास्य अभिनेता हरिवंश आचार्यले आफ्नो ‘बीवाईडी एट्टो–३’ ईभी अन्डरग्राउन्ड पार्किङमा लगे । पार्किङस्थल दुई–तीन तला गहिरो थियो । गाडी लिएर तल झर्न त सजिलै भयो । तर, फर्किने बेला भने उनको मनमा एउटै प्रश्न खेलिरह्यो– यति ठाडो उकालोमा यो गाडीले आफूलाई माथि निकाल्ला त ?

‘गाडी त ल्याएँ, अब तीन तला तलबाट कसरी माथि निकाल्ने होला ?,’ त्यो कार्यक्रमभरि उनको मनमा यही कुरा खेलिरह्यो ।