जन्तर–मन्तरमा प्रदर्शन : १०० भन्दा बढी पक्राउ, ११ मेट्रो स्टेसन बन्द

नयाँ दिल्ली । भारतको राजधानी नयाँ दिल्लीमा मुख्य निर्वाचन आयुक्त ज्ञानेश कुमारको राजीनामा माग गर्दै भएको प्रदर्शनका क्रममा प्रहरीले १०० भन्दा बढी प्रदर्शनकारीलाई नियन्त्रणमा लिएको छ । आम आदमी पार्टी (आप), विद्यार्थी संगठन, युवा कांग्रेस तथा नागरिक समाजका समूहहरू सहभागी प्रदर्शनलाई लक्षित गर्दै दिल्ली प्रहरीले जन्तर–मन्तर क्षेत्रमा व्यापक सुरक्षा व्यवस्था गरेको छ ।

प्रदर्शनकारीहरूले निर्वाचन आयोगको कार्यशैली र स्पेसल इन्टेन्सिभ रिभिजन (एसआईआर) अन्तर्गत मतदाता नामावली पुनरावलोकन प्रक्रियामाथि प्रश्न उठाउँदै आएका छन् । उनीहरूले मतदाता नामावलीबाट योग्य मतदाताको नाम हटाइएको आरोप लगाउँदै मुख्य निर्वाचन आयुक्त ज्ञानेश कुमारको राजीनामा माग गरेका छन् । निर्वाचन आयोगले भने एसआईआरको उद्देश्य मतदाता सूचीमा रहेका दोहोरो, अयोग्य वा अन्य त्रुटिपूर्ण नाम हटाउनु रहेको बताउँदै आएको छ ।