चीन र स्पेनबीच निकटता बढ्दा ईयू सदस्य राष्ट्रमा आक्रोश चर्किँदै

काठमाडौं – युरोपेली संघ ईयूले चीनबाट आयात हुने विद्युतीय सवारी साधनमाथि थप भन्सार महसुल (ट्यारिफ) लगाउने तयारी गरिरहेका बेला स्पेन र चीनबीचको आर्थिक तथा कूटनीतिक निकटता तीव्र रूपमा बढेको छ । बेइजिङसँग मड्रिडको सम्बन्ध गहिरिँदै जाँदा युरोपेली संघका अन्य सदस्य राष्ट्रहरूमा असन्तुष्टि र आक्रोश बढेको छ ।

स्पेनका प्रधानमन्त्री पेड्रो सान्चेजले हालैको चीन भ्रमणका क्रममा युरोपेली आयोग र सदस्य राष्ट्रहरूलाई चिनियाँ ईभीमाथिको अतिरिक्त कर पुनर्विचार गर्न र सम्भावित व्यापार युद्ध रोक्न सार्वजनिक आह्वान गरेपछि ईयूभित्रको आन्तरिक मतभेद सतहमा आएको हो ।