४२औं राष्ट्रिय ब्याडमिन्टन प्रतियोगिता: रसिला र प्रफुलको दोहोरो जित

नेपाल नम्बर एक खेलाडी रसिला महर्जन र प्रफुल महर्जनले जारी ४२औं राष्ट्रिय ब्याडमिन्टन प्रतियोगितामा दोहोरो जित निकालेका छन्।

नेपाल ब्याडमिन्टन संघको आयोजनामा भएको प्रतियोगितामा त्रिभुवन आर्मी क्लबका रसिला र प्रफुल दुवैले सिंगल्स र मिक्स डबल्समा समान दुई जित आत्मसात् गरे । त्रिपुरेश्वरस्थित राष्ट्रिय खेलकुद परिषद् (राखेप) को कभर्डहलमा महिला सिंगल्समा रसिलाले कर्णाली प्रदेशकी निशा सिंहलाई सहजै हराउँदै पहिलो सफलता निकालिन् । रसिलाले निशालाई २१–३ र २१–८ ले हराइन् । उनले प्रफुलसँग मिलेर मिक्स डबल्समा पनि जित आत्मसात् गरिन् । प्रफुल र रसिलाले एपिएफका क्षितिज खनाल र स्वर्लिन श्रेष्ठलाई २१–१९ र २१–१५ ले हराए।