कांग्रेसमा गगनको जोखिमपूर्ण यात्रा : परिवर्तनको वैकल्पिक बाटो ?

काठमाडौँ — नेपाली कांग्रेसका महामन्त्री गगन थापा यतिबेला पार्टीभित्र र बाहिरबाट दोहोरो दबाबमा छन्। एकातिर, पार्टीको संस्थापन पक्षले उनलाई नेतृत्वविरुद्ध विद्रोह गरेको आरोपमा घेरेको छ भने अर्कोतिर समाज र कांग्रेसका शुभचिन्तकहरूले पुरानो संरचना भत्काएर नयाँ नेतृत्व स्थापित गर्न उनलाई दबाब दिइरहेका छन्। कतिपय शुभेच्छुकले त स्पष्ट रूपमा 'पुरानो पुस्तालाई भत्काएर अघि बढ, नभए नयाँ पार्टी बनाऊ' भन्ने दबाब दिएका छन्।

भदौ २४ मा प्रदर्शनकारीको आक्रमणपछि सभापति शेरबहादुर देउवा घाइते भएर अस्पतालको बेडमा रहँदा थापाले नेतृत्व परिवर्तनको कुरा उठाएको भन्दै संस्थापन पक्षले उनलाई निशाना बनाइरहेको छ। यही घेराबन्दीबीच उनले विशेष महाधिवेशनको मागलाई आफ्नो प्रमुख एजेन्डा बनाएका छन्, जसलाई अर्का महामन्त्री विश्वप्रकाश शर्माको साथ र समर्थन छ। थापाको यो यात्राले कांग्रेसको भविष्यलाई कस्तो दिशा दिन्छ ?