स्तनपान: आमा र शिशुको मात्र होइन, स्वस्थ परिवार र समृद्ध  राष्ट्र निर्माणका लागी पहिलो लगानी हो!

कल्पना गर्नुस् त, एउटा यस्तो प्राकृतिक वरदान, जसले नवजात शिशुलाई संक्रमणबाट जोगाउँछ, कुपोषणको जोखिम घटाउँछ, मस्तिष्कको स्वस्थ विकासमा सहयोग गर्छ, भविष्यमा मधुमेह र मोटोपनाको जोखिम कम गर्छ, आमालाई स्तन तथा डिम्बाशय क्यान्सर तथा अन्य जोखिमबाट जोगाउँछ, परिवारको स्वास्थ्य खर्च घटाउँछ र अन्ततः एउटा राष्ट्रको मानव पूँजीलाई समेत सुदृढ बनाउँछ। अझ अचम्मको कुरा त, यस्तो अमूल्य "औषधि" हरेक शिशुले जन्मिनेबित्तिकै निःशुल्क प्राप्त गर्न सक्छन् र त्यो हो उनको आमाको स्तनबाट आएको दूध।

प्रकृतिले नवजात शिशुका लागि तयार गरेको यो पहिलो, पूर्ण र जीवनरक्षक आहारलाई आजसम्म कुनै पनि प्रयोगशाला, कुनै औषधि वा कुनै कृत्रिम उत्पादनले प्रतिस्पर्द्धा गर्न सकेको छैन। त्यसैले स्तनपानलाई केवल पोषणको विषय मानिदैन; यो बालस्वास्थ्य, मातृस्वास्थ्य, परिवारको आर्थिक सुरक्षा, मानव विकास र राष्ट्रको समृद्धिसँग प्रत्यक्ष जोडिएको सार्वजनिक स्वास्थ्यको सबैभन्दा प्रभावकारी र कम लागतको लगानीमध्ये एक मानिन्छ।