चौसट्ठी रोपनीमा फैलियो खुत्रुकेको बचत

वैदेशिक रोजगारीबाट फर्किएपछि कुखुरापालनमा लगानी गरेर ऋणमा डुबेका पाणिनि गाउँपालिका–१, पणेनाका गुनप्रसाद श्रेष्ठ अहिले व्यावसायिक कृषिमा सफल बन्नुभएको छ । श्रीमतीले घरखर्चबाट बचाएर खुत्रुकेमा जम्मा गरेको दुई लाख रुपियाँबाट सुरु भएको उहाँको कृषि यात्रा अहिले ६४ रोपनी जमिनमा फैलिएको छ ।

कुखुरापालनबाट एक वर्षमै पाँच लाख रुपियाँ ऋण लागेपछि श्रेष्ठ पुनः वैदेशिक रोजगारीमा जाने तयारीमा हुनुहुन्थ्यो । श्रीमती सुन्दरीले विदेश जान रोक्दै खुत्रुके फुटाएर जम्मा गरेको दुई लाख रुपियाँ उहाँको हातमा थमाउनुभयो । त्यही रकमबाट एउटा दुहुनो भैँसी खरिद गरी सुरु भएको व्यवसाय क्रमशः विस्तार हुँदै अहिले व्यावसायिक तरकारी खेतीमा पुगेको हो ।