निजामतीमा ‘छड्के प्रवेश’ : सीधै सचिव नियुक्ति गर्ने तयारीले तरंग

काठमाडौं : अब सरकारले सीधा सरकारमै सचिव नियुक्त गर्न सक्ने भएको छ। संसद्मा दर्ता भएको संघीय निजामती सेवा विधेयकमा कर्मचारीतन्त्रमा करारबाट नियुक्त हुने व्यवस्था गरिएको छ। विधेयकको दफा १० को उपदफा १४ र १५ मा कार्यकारी वा प्राविधिक क्षेत्रमा करारमा कर्मचारी नियुक्त गर्न सक्ने व्यवस्था छ।

विधेयकको दफा १० (१४) मा विशिष्ट प्रकृतिको कुनै कार्यकारी वा विशेषज्ञ पदका लागि निजामती सेवाभित्र जनशक्ति उपलब्ध हुन नसक्ने भएमा नेपाल सरकारले उम्मेदवारको उपयुक्तताको सम्बन्धमा लोक सेवा आयोगको परामर्श लिई निश्चित अवधिको लागि नियुक्त गरी काम लगाउन सक्ने उल्लेख छ। दफा १५ मा यसरी नियुक्त हुने उम्मेदवारको योग्यता, छनोटको विधि, कार्यसम्पादन करार, सेवा सर्त तथा सुविधालगायतका विषय लोक सेवा आयोगको परामर्शमा मन्त्रिपरिषद्ले निर्धारण गरेबमोजिम हुने उल्लेख छ। वर्तमान कर्मचारीतन्त्रमा रहेकाभन्दा विज्ञ जनशक्ति भित्र्याएर काम गराउन यो व्यवस्था ल्याइएको बताइएको छ।