मधेसका आठ जिल्लाको भन्सारमा कुन व्यापारीलाई तस्करीको कुन लाइन खुला ?

वीरगंज । सीमा क्षेत्रबाट हुने अवैध ओसारपसार रोक्न सरकारले अत्याधुनिक हतियार र बन्दोबस्तीका सम्पूर्ण सामान दिएर सशस्त्र प्रहरी बललाई खटाएको भए पनि उनीहरुकै प्रत्यक्ष संलग्नतामा मधेस प्रदेशका आठ वटै जिल्ला तस्करहरूलाई जिम्मा लगाएको पाइएको छ । सीमामा तस्करहरुलाई आफ्नो अनुकूल गर्न दिए बापत प्रत्येक महिना मासिक २ करोड रुपैयाँ सशस्त्र प्रहरी बल नेपाल नं. २ छिन्नमस्ता बाहिनी मुख्यालय महोत्तरीले बुझ्दै आएको गम्भीर आरोप सरोकारवालाहरुले जनाएका छन् । सो बाहिनीका प्रमुख सशस्त्र प्रहरी नायब महानिरीक्षक गणेश ठाडा मगर छन् ।

सशस्त्रका डीआईजी मगरले आधा दर्जनभन्दा बढी मधेसी समुदायका सशस्त्र प्रहरी हवल्दार एवं सहायक हवल्दारलाई आठ वटै जिल्लाबाट तस्करहरूलाई ‘लाइन’ दिएर महिनावारी असुल गर्न टोली खटाएको स्रोतको दाबी छ । रविकान्त मिश्र, आत्माराम पटेल, गगनदेव साह, रामखेलावन यादव, वशिष्ठ पटेल, सुकदेव बैठा र अशोक साहलाई मधेस प्रदेशमा परिचालित गरी रकम संकलन भइरहेको बाहिनी निकट स्रोतले जनाएको छ ।