कांग्रेसमा नवीन संकल्पको वास्तविक परीक्षा 

बीपी कोइरालाको स्मृति दिवस हरेक वर्ष मनाइन्छ । माला चढाइन्छ, विचारको चर्चा हुन्छ, परिवर्तनका प्रतिबद्धता दोहोरिन्छन् । यद्यपि एउटा प्रश्न वर्षौंदेखि अनुत्तरित छ त्यो हो बीपीलाई हामी सम्झिरहेका छौँ कि केवल कर्मकाण्ड पूरा गरिरहेका छौ ? अझ गम्भीर प्रश्न त यो हो कि बीपीको विचारले कांग्रेसलाई नेतृत्व गरिरहेको छ कि कांग्रेसले बीपीको नामलाई मात्र आफ्नो राजनीतिक वैधताको आधार बनाइरहेको छ ?

यदि बीपीको नाममा सभा गर्ने तर पार्टीभित्र लोकतान्त्रिक संस्कार कमजोर हुँदै जाने हो, यदि बीपीको समाजवादको चर्चा गर्ने तर जनताको पीडा राजनीतिक प्राथमिकतामा नपर्ने , यदि बीपीको आदर्शको प्रशंसा गर्ने तर निर्णयहरू सीमित शक्ति–केन्द्रको वरिपरि घुम्ने हो भने स्मृति दिवस केवल औपचारिक कर्मकाण्डमा सीमित हुनेछ। बीपी प्रतिको वास्तविक सम्मान व्यवहारले प्रमाणित हुनु पर्छ।