जब खम्पा भन्दै चिनियाँले बमप्रसादको हत्या गरे

खम्पा काण्डमा मारिने नेपाली सेनाका पहिलो सदस्य हुन्, बमप्रसाद बाँस्कोटा। १६ असार २०१६ मा चिनियाँ सेनाले मुस्ताङस्थित नेपाल–चीन सीमामा उनको हत्या गर्‍यो। त्यतिबेला सो हत्याको अन्तर्राष्ट्रियकरण हुनै लागेको थियो। तर, नेपाल र चिनियाँ सरकारले यसलाई गुपचुप गराए।

बमप्रसादको जन्म पूर्वी पहाडको ओखलढुंगास्थित थाम्ले गाउँमा भएको थियो। उनी २००५ सालमा सेनामा भर्ना भएका थिए। निम्न आय भएको परिवारमा जन्मिएका बमप्रसाद सुबेदार पदमा बढुवा भइसकेका थिए। जतिबेला मुस्ताङमा उनको हत्या भयो, त्यतिबेला उनले अधिकृत क्याडेटको तालिम सकिसकेका थिए र पुनः बढुवाको सूचीमा थिए।