जीवनको दोसाँधमा खोजिएको मुक्ति

विगतका पानाहरू पल्टाउँदा कहिलेकाहीं केही दृश्य यति जीवन्त भएर अगाडि उभिन्छन् कि समयको दुरी आफैं बिलाएर जान्छ। २०६६/६७ सालतिर म ललितपुर जिल्ला अदालतको न्यायाधीश थिएँ। न्यायको आसनमा बसेको मान्छेले अनेकौं अनुहार देख्छ - आशा, निराशा, पीडा, क्रोध, आग्रह, प्रतिवाद। ती सबैमध्ये एउटा अनुहार आजसम्म मनभित्र कतै अड्किएर बसेको छ– एक वृद्ध महिलाको।

उमेरले डाँडो काटिसकेकी, सम्भवतः पचहत्तर वर्षकी थिइन् उनी। अनुहारमा समयका गहिरा रेखा, आँखामा अनुभवका हजार कथा र बोलीमा असाधारण शान्त दृढता। उनी सम्बन्धविच्छेदको निवेदन लिएर आएकी थिइन्।