गणतन्त्रपछि मुलुकमा विकासले लय लिएको छ : सभामुख घिमिरे

काठमाडौँ । प्रतिनिधिसभाका सभामुख देवराज घिमिरेले मुलुकमा सङ्घीय लोकतान्त्रिक गणतन्त्र स्थापना भएपछि विकासले लय लिएको बताएका छन् । गणतन्त्र दिवस–२०८१ का अवसरमा राष्ट्रिय समाचार समितिले आयोजना गरेको ‘गणतन्त्रका उपलब्धिः समृद्धिका लागि पूर्वाधार’ शीर्षकको तस्वीर प्रदर्शनीको अवलोकनपश्चात् उनले गणतन्त्रपछि मुलुकमा भौतिक विकास र मानवीय विकास भइरहेको बताए ।

“प्रदर्शनीमा राखिएका सबै तस्वीर हेरेँ, तस्वीर हेर्दा प्रभावित भएँ”, सभामुख घिमिरेले भने, “तस्वीरमा खासगरी पुराना योजना के थिए र ती योजनाको वर्तमान रुप कस्तो छ ? भनेर प्रष्टरुपमा देखाइको छ, गणतन्त्र आइसकेपछि भएका भौतिक क्षेत्रमा विकास र उपलब्धि देखेर खुसी लाग्यो ।” उनले समग्र राष्ट्रिय क्षेत्रलाई समेटेर तस्वीरमार्फत प्रस्तुत गरिएको प्रदर्शनीले यो सबै विकास नेपालमै होर भन्ने भान भएको सुनाए ।