कांग्रेसलाई क्रान्तिभूमिको खबरदारी– शहीदको सन्देश नभुल्नू

ओखलढुङ्गा श्री चम्पादेवी र जलजलेश्वर महादेवको धार्मिक आस्थाले रक्षित पवित्र भूमि मात्र होइन । यो युगकवि सिद्धिचरण श्रेष्ठ र व्याकुल माइलाको साहित्यिक सिर्जनाले सुसंस्कृत, ’जिउँदो शहीद’ क्याप्टेन यज्ञबहादुर थापा तथा महान् प्रजातान्त्रिक योद्धाहरू राम–लक्ष्मण उपाध्याय जस्ता व्यक्तित्वहरूको बलिदानले रक्तरञ्जित भूमि पनि हो । निष्ठाका प्रतिमूर्ति बलबहादुर राईजस्ता राजनीतिक व्यक्तित्वको चेतनाले सिञ्चित यो धर्तीको आफ्नै ऐतिहासिक गरिमा छ ।

नेपालको प्रजातान्त्रिक आन्दोलनको सफल इतिहास काठमाडौँका राजनीतिक केन्द्र र राष्ट्रिय नेताहरूको गतिविधिले मात्र निर्माण भएको होइन। त्यसमा लोकतन्त्रको जग बसाल्ने क्रममा देशका गाउँ, पहाड र दूरदराजका बस्तीका नागरिकले उठाएको जोखिम, भोगेको दमन र दिएको बलिदानको उत्तिकै महत्वपूर्ण योगदान छ ।