प्रधानमन्त्रीद्वारा कमजोरी स्वीकार, संसद् चल्यो

काठमाडौं । नेपाल कम्युनिस्ट पार्टी (माओवादी केन्द्र)का अध्यक्ष समेत रहनुभएका प्रधानमन्त्री पुष्पकमल दाहाल ‘प्रचण्ड’ले संसद् बैठकमा भावनामा बहकिएर प्रितम सिंहबारे आफूले दिएको अभिव्यक्ति गल्ती भएको स्वीकार गर्दै आत्मालोचना गर्नुभयो । उहाँले अबदेखि आफू सतर्क रहने प्रतिबद्धता व्यक्त संसद्को कामकारबाहीलाई सबै सांसद मिलेर निरन्तर अघि बढाउन आग्रह पनि गर्नुभयो । सोमबार संसद् बैठकलाई सम्बोधन गर्दै प्रधानमन्त्री प्रचण्डले सरदार समुदायका भारतीय व्यवसायी प्रितम सिंहले एकपटक आफूलाई प्रधानमन्त्री बनाउन धेरै मेहनत गरेको भन्ने अभिव्यक्ति दिनु आफ्नो कमजोरी भएको स्वीकार गर्नुभएको हो ।

आफूले प्रधानमन्त्रीको हैसियतामा उक्त कुरा बोल्न नहुने स्वीकार गर्दै प्रचण्डले भन्नुभयो– ‘प्रधानमन्त्रीको हैसियतले त्यस्तो भाषा नबोल्नुपथ्र्यो, ज्ञानुको बुबा भएर बोल्न पुगेँ ।’ यातायात व्यवसायी प्रितम सिंहसँग पारिवारिक सम्बन्ध रहेको बताउँदै प्रचण्डले २०६८÷०६९ सालमा आफ्नी छोरी ज्ञानु दाहाल क्यान्सर भएपछि दिल्ली पुगेका बेला भएको संवाद आफूले स्मरण गरेको जिकिर गर्दै उहाँले भन्नुभयो– ‘सामाजिक सेवा र यातायात मात्रै होइन, राजनीतिमा समेत रुचि राख्नुहुन्छ भनेको हुँ । त्यही बेलाको कुरा सम्झेँ । प्रितमजीले भनेको पनि सम्झेँ । म भावनात्मक छु नै । ज्ञानु अन्तिम अवस्थामा पुगेको समयमा भेट्न जाँदा प्रितमको दिल्लीस्थित फ्ल्याटमा भएको उक्त संवाद सम्झिएको हुँ।’