पछि हट्यो सशस्त्र

सशस्त्र प्रहरी बलको एपिएफ फुटबल क्लब आफ्नो निर्णयबाट पछि हटेको छ । एपिएफले गत आइतबार आफ्ना ११ राष्ट्रिय महिला खेलाडीलाई अखिल नेपाल फुटबल संघ (एन्फा)को प्रशिक्षणमा नपठाउने निर्णय गरेको थियो । जसका कारण एपिएफका महिला खेलाडीले तीन दिनदेखि प्रशिक्षण गर्न पाएनन् । एपिएफमा राष्ट्रिय टोलीका कप्तान तथा गोलरक्षक एन्जिला तुम्बाप्पो सुब्बा, स्ट्राइकर सावित्रा भण्डारी, सरु लिम्बू, अनिता केसी, गीता राना, हिराकुमारी भुजेलसहित अधिकांश खेलाडी आबद्ध छन् ।

एपिएफका ११ खेलाडी प्रशिक्षणमा सहभागी नहुँदा २८–३१ असारसम्म बंगलादेशमा हुने दुई मैत्रीपूर्ण फुटबल प्रतियोगिता अनिश्चित बनेको थियो । बंगलादेशसँगको मैत्रीपूर्ण खेलबारे एन्फा अन्योलमा रह्यो । एन्फा सिनियर खेलाडी र यू–२० राष्ट्रिय टोलीमध्ये एक ढाका पठाउने अवस्थामा पुगेको थियो । व्यापक विरोधपछि एपिएफले बुधबार आफ्नो पूर्ववत् निर्णय सच्याएर आफ्नो मातहतमा रहेका खेलाडीलाई प्रशिक्षणमा पठाएको छ ।