‘घुम्ने संस्कृतिले आन्तरिक पर्यटनमा टेवा’

गण्डकी प्रदेशका उद्योग तथा पर्यटनमन्त्री यशोदा रिमालले नेपालीमा बढ्दो घुम्ने संस्कृतिले आन्तरिक पर्यटन प्रवर्द्धनमा महत्त्वपूर्ण सहयोग पुगेको बताउनुभएको छ । मनाङस्थित एकीकृत सेवा कार्यालयमा आइतबार आयोजित अन्तक्र्रिया कार्यक्रममा उहाँले पर्यटन क्षेत्र चलायमान हुँदा आर्थिक गतिविधिमा टेवा पुग्ने उल्लेख गर्नुभयो ।

“बढ्दो घुम्ने संस्कृतिले पर्यटन व्यवसाय, रोजगारी सृजनासँगै समग्र अर्थतन्त्रमा सकारात्मक प्रभाव पार्छ”, मन्त्री रिमालले भन्नुभयो । उहाँले उच्च पहाडी तथा हिमाली भेगमा घुम्न आउने पर्यटकको व्यवस्थापन र उनीहरूको स्वास्थ्य सुरक्षामा विशेष ध्यान दिनुपर्ने बताउनुभयो । लेक लाग्नेजस्ता स्वास्थ्य जोखिमबाट बच्ने उपायबारे सचेतना फैलाउनपर्ने उहाँको भनाइ छ ।