७० देशका प्रतिस्पर्धीलाई पछि पार्दै नेपाली विद्यार्थीले जिते अन्तर्राष्ट्रिय आइटी पुरस्कार

विश्वका ७० भन्दा बढी देशका विद्यार्थी सम्मिलित एआई, रोबास्टिक र कोडिङसम्बन्धी अन्तर्राष्ट्रिय प्रतियोगिता (कोडभोर ७.०) मा नेपाली विद्यार्थी पुरस्कृत भएका छन्।

इन्डोनेसियाको राजधानी जाकार्तामा यही जेठ २ र ३ गते सम्पन्न प्रतियोगितामा नेपालका तर्फबाट भाग लिने ६ विद्यार्थी टोली पुरस्कार जित्न र तीन टोली ३० उत्कृष्टभित्र पर्न सफल भएका हुन्। संयुक्त राष्ट्रसंघले लिएको दिगो विकास अवधारणासँग सम्बन्धित भई वायु प्रदूषण, दूषित पानी, आधुनिक कृषि प्रणाली, औषधि व्यवस्थापनजस्ता विषयमा नवीनतम् अवधारणा पेस गरी नेपाली विद्यार्थीले अन्तर्राष्ट्रिय पुरस्कार जितेका हुन्।